創業哲學筆記：
點樣經營 700+ 創業家群

點樣經營一個 WhatsApp 群由零開始到 700+ 創業家價值群：我點樣用「長期主義」玩一場反直覺嘅社群遊戲

經常有朋友問我：「Alex，你今年 1 月嗰篇 Threads，點解可以喺 7 日內反直覺地吸到 406 個老闆主動入群？仲要而家增長到 700 幾個創業家，差不多日日有嘢傾，係咪有咩秘技？」

我通常會笑住答：「重點從來唔係嗰篇 post 有幾勁，或者個 group 有幾正，而係你開咗個場，接唔接得住呢幾百人。」

流量，從來只係入場券；人流入咗嚟之後，你有冇一個聚腳地畀佢哋停留、交流、甚至互相提供價值做起件事？所以我成日強調：「流量係術，哲學係道。」

Threads 係術，WhatsApp 群都只係術；決定一個社群能否長玩長有，係你背後嗰套「底層邏輯」同價值觀。

Day 1：唔係開群，係賦予一個「共同身份」

今年 1 月 11 日，我個 group 由零人開始發咗第一篇純文字 Threads。冇跟風搶熱點、冇玩互追互 like、冇科水買廣告。我只係由「第一性原理」出發，篤中一個死穴：創業者其實好孤單，極度需要一個可以真誠交流、甚至對接資源嘅「同路人圈子」。

嗰篇 post 唔係夾硬 sell 嘢，係純粹提供 Value。我冇吹水保證「入群就爆單」，我只係講：如果你係老闆、創業者或者 Slasher，想搵班同路人認真傾生意、傾變現，就入嚟。

呢度帶出第一個核心原則：你唔係要吸引所有人，你係要「篩選」啱嘅人。

正如我好推崇嘅矽谷創業大神 Naval Ravikant 喺《納瓦爾寶典》入面講過一句好中應嘅說話：
「Play long-term games with long-term people.（同長線嘅人，玩長線嘅遊戲）。」

「創業者」呢三個字，本身就係一個超強濾鏡。想入嚟呃水吹、搵著數嘅人睇完會自動過主；係同路人，就會即刻覺得：「呢個場係為我而設。」一開始你想和稀泥取悅所有人，最後只會得返一班唔願認真交流嘅過客。

入群唔等於信任：頭 7 日嘅「破冰與定調」

有人以為 406 人入群就叫成功，開心到開香檳。對我嚟講，真正嘅考驗先啱啱開始。入群只係㩒個掣，信任先係真正嘅 Asset。

要令大家覺得「呢度同出面啲吹水群、派卡片群唔同」，我會先做好三件事去定調：

• 立規矩： 講明呢度係交流創業、流量、變現嘅地方；嚴禁白嫖、嚴禁一入嚟就狂 send 私訊「R 生意」。
• 高質量自介： 我會要求新加入嘅老闆講清楚：你做緊咩？你痛點係咩？你可以點幫到大家？大家攤開底牌傾，因為商業合作從來唔係靠圍爐取暖，而係建基於「我知你需要咩，你知我有咩資源」。
• 促成第一次 Value Exchange： 可能係解答一個疑難、分享一個案例，甚至親自回覆一個新成員嘅困惑。群規寫得再靚都冇用，要令大家親眼睇到：原來喺呢度發問，真係有料到，真係有回音。

中期：唔靠日日催谷，靠「可預期嘅價值」

一個群最怕嘅唔係人少，而係「死寂」。好多群開頭熱熱鬧鬧，一個月後變一潭死水，個個潛晒水。因為成員唔知留低有咩價值。

我唔會做保母日日 push 大家傾偈，我做嘅係建立一種「可預期嘅價值節奏」：

• 有人問問題，自然有猛人解答。
• 有人需要搵 Supplier 或客源，自然有人幫手 Tag 啱嘅對象。
• 有人分享「最貴學費」嘅踩坑經驗，大家會互相借鏡。

呢種氛圍，其實係一項文化工程。當你令大家相信：喺呢度分享唔會蝕底，提問唔會被笑。群組就會自動波運轉，產生複利效應，唔使你日日人工泵氣。

後期：由吹水群進化成「高密度商業網絡」

群組發展到 700+ 人（後來仲衍生出 Foodies 群、Threads 引流群、餐飲老闆群、教育群等細分網絡），我更加確定一件事：社群嘅威力，唔在於人頭數目，而在於「連結密度」。

呢個階段，我必須搬出查理·芒格（Charlie Munger）嘅一個核心思想。佢成日強調：
「The highest form of a civilization is a seamless web of deserved trust.（人類文明/商業社會嘅最高形式，係一張無縫嘅、值得被信任嘅網）。」

700 個潛水客只係一個虛榮數字；但如果入面有 50 個老闆互相認識、轉介、合作，呢張就係芒格講嗰張「無縫信任網」。

以前我以為要做一個超級節點（Super Connector），不斷親自落場做 Matchmaking，幫大家配對。但後來我發現一個反直覺嘅現象：最高級嘅社群營運，係「去中心化（Decentralization）」。

科技思想家凱文·凱利（Kevin Kelly）喺經典巨著《失控》（Out of Control）入面講過一句好震撼嘅說話：「你要得到絕對嘅掌控，首先你要學識放手。」（To get control, you have to let go.） 真正強大、最幫到人嘅生態圈，從來都係去中心化嘅。有人做設計、開餐廳、做 B2B、做教練，大家各有供求。如果所有配對都要經我手，我反而會成為個群嘅樽頸。所以我做嘅，係定好個框架同信任底線，然後完全放手，由得佢哋自己去 Matching。結果？佢哋碰撞出嚟嘅火花同合作，比我單向配對好一百倍。

但係，點樣確保大家喺去中心化嘅狀態下，依然保持極高質量嘅信任？
答案係：線下見面（Offline Connection）。

網上吹水十句，唔及出嚟飲杯嘢見一面。所以，就算搞 Event 絞盡腦汁諗主題、度 rundown、搵場地、統籌安排真係好鬼死辛苦，我都堅持定期搞線下聚會。由今年四月嘅《納瓦爾寶典》讀書會、五月嘅「新蒲崗之夜」、六月好 hardcore 嘅「創業最失敗最貴學費分享會」，去到八月嘅「Threads 營運實戰夜」，甚至十月尾嘅《馬斯克寶典》反直覺吹水會……每一次我都攞個心出嚟搞。

因為我知道，見過真人，先有真信任。

而家群入面 700 幾人，當中有超過 20% 嘅老闆，係我親眼見證過佢哋走出嚟實體見面嘅。呢 20% 嘅「真人見面率」，令到整個社群嘅信任感呈現指數式倍增（Exponential Growth）！做生意從來唔係「一入群就劏你一頸血」，而係「我線下見識過你個人實淨、靠譜，到我或者身邊嘅人有需要，我第一時間諗起你」。

就係呢份見過面嘅堅實信任底盤，先可以令個群喺 700+ 人嘅規模下，依然增長得咁穩健。

📸

真實見證：線下高密度商業網絡

「短短兩個鐘嘅交流，感受大家跨界別思維碰撞嘅威力☕️...呢個聚會最難得嘅，係大家唔止流於表面交換卡片，亦分析各行各業生意定位，由零到一拆解點樣精準搵客、優化架構... 高質素嘅對話，永遠係促成新機遇嘅起點。」

— Zoe Chema 張睿真 (車媽)

企業家 / 專業跨界活動統籌及藝人宣傳

💡 連專業從事「活動統籌」的企業家，都高度認可社群線下聚會的跨界實戰價值，印證這不是一個普通的吹水群。

✓ 跨行業實體對接 ✓ 拒絕無效交換卡片

點解我堅持「流量係術，哲學係道」？

坊間太多人教「爆款公式」。我可以教你點寫 Hook、點玩反直覺流量、點做 CTA；但如果你冇一套清晰嘅底層哲學，技巧再好，都只會加速吸引一班錯嘅人。作為一個 50+ 嘅 Threads 流量玩家，我嘅態度好明確：

• 唔追短線流量，只累積長期信任。
• 唔討好所有人，只服務精準同路人。
• 唔將人當「韭菜/水魚」，將人當未來嘅戰友同 Partner。
• 唔靠演算法定義你，靠你持續輸出嘅價值定義你。

平台演算法會變，WhatsApp 群有生命週期。但一個清晰嘅個人品牌、一班信你嘅人、一個願意互相成就嘅網絡，係可以跟住你一世嘅核心資產。