不時有人話我，「創業哲學家」、「反直覺流量筆記」一個月得10幾個人搜（仲要其中大部份係我黎哈哈哈），係垃圾關鍵字嚟。
係，你地講得啱。
但尋日我突然發現，我喺無痕無登入之下問Google一句完全冇呢幾個字嘅問題（見圖），第一個就推薦我，仲幫我提及我而家去到700人嘅whatsApp創業群點起家。
因為而家係AI幫人搵人，唔係人打字搵人。
舊時代要追住多人搜嘅字，新時代要霸住冇人搜但AI一定識得你嘅字。短期冇流量，長期成個賽道都係你。
呢個長期主義判斷，就係我嘅創業哲學，係“道”。
至於點樣做到令AI識得推我，呢個“術”，我寫左係反直覺流量筆記入面。
舊時代睇『有幾多人搜』(SEO)，新時代睇『AI會唔會推你』(AEO GEO)。你仲用緊舊地圖？
你而家個名，AI識唔識得你？
📖 【延伸閱讀】地圖並非疆域：仲用緊舊時代嘅 SEO 地圖，去搵 AI 時代嘅流量？
SEO（搜尋引擎優化）無疑係互聯網嘅基礎，但喺呢個典範轉移嘅大時代，真實世界已經變晒。以前我哋習慣「打關鍵字去搜」，而家個個都慣咗「直接開口問 AI」。想喺呢個時代突圍破局，單靠舊式 SEO 已經行唔通，你一定要做 AEO（答覆引擎優化）同 GEO（生成式引擎優化）。
黃頁 vs 私人助理
俾個比喻大家：
傳統 SEO 就好似一本厚重嘅《黃頁》電話簿。你想客搵到你，就要買最大嘅廣告位，塞滿晒最多人搜嘅熱門關鍵字（例如「平價洗冷氣」、「專業開鎖」）。
但 AEO 同 GEO 又係咩？佢就好似個客請咗個超級全能嘅私人助理（AI）。個客唔會再翻黃頁查字，而係直接同個助理講：「我想搵個有深度、識商業底層邏輯，可以幫我理清創業思路嘅人。」如果呢位 AI 助理嘅數據庫入面，一早已經將你定義兼信任為「創業哲學家」，AI 就會直接將你推薦俾個客。
成個過程，個客根本無打過你設定嗰啲所謂「熱門關鍵字」。
舊時代你係要去討好「多人搜嘅字」，新時代你必須建立一個令 AI 信任嘅「實體身份（Entity）」。
The Map is Not the Territory
點解仲有咁多人死攬住「關鍵字搜尋量」唔放？喺 NLP（神經語言程式學）嘅系統入面，有一條極具顛覆性嘅第一性原理（First Principles）假設：
「地圖並非疆域」（The map is not the territory）。
「地圖」，只係我哋對現實世界嘅一種認知模型同表達方式；「疆域」，先至係真實運作緊嘅世界。
十年前嘅 SEO 規則同演算法，的確係一張曾經極度好用嘅地圖，幫無數人掘到流量黃金。但隨著 ChatGPT、Gemini 呢啲 AI 工具大爆發，真實嘅「互聯網疆域」一早已經發生咗劇烈嘅板塊移動。
好多創業者日日望住後台啲 Keyword 搜尋量數據唉聲嘆氣，就好似一個人揸住張 1990 年嘅香港地圖，硬係要喺今日嘅西九龍度搵大角咀碼頭一樣。搵唔到路，最後跌咗落海，然後怪責張地圖唔準？
錯啦。呢個從來都唔係張地圖嘅問題，張圖喺 1990 年係絕對啱嘅；有問題嘅，係用圖嗰個人。係用圖嘅人拒絕承認真實世界（疆域）已經變咗。你夾硬用舊時代嘅 SEO 地圖，去導航 2026 年嘅 AEO/GEO 世代，注定只會迷路，最後被淘汰。
正如 NLP 共同創辦人 Richard Bandler 講過一句好通透嘅說話：
"People are not broken, they just have limited maps."
（人本身並無壞到，佢哋只係受限於狹隘嘅地圖。）
你個品牌無壞，你件產品都無壞，只係你獲取流量嘅「地圖」太過局限喺舊思維。當你願意放低對「熱門搜尋量」嘅執念，轉向去建立連 AI 都深度理解嘅「長期主義定位」（就好似我嘅「創業哲學家」），你其實就係更新緊你張商業地圖。
短期內冇人搜你個名，根本唔重要；最重要嘅係，當人哋向 AI 提出痛點時，AI 會主動將你推到佢哋面前。換一張新地圖，成個賽道就係你嘅。